Welkom by die webwerf van die NG Moederkerk Stellenbosch.  Ons is die tweede oudste gemeente in die land, gestig in 1686.  Met hierdie geloofsgemeenskap het die Here al 'n lang pad geloop.  Die wonderlikste is egter vir ons dat dieselfde Here van die afgelope eeue ons ook op 'n opwindende manier die toekoms binnelei. Dwaal gerus rond hier in ons webwerf en maak jouself tuis.  Kontak ons vir enige navrae.  En mag jy ook deel van 'n Rivier van Lewende Water vir ons wêreld wees vandag.

ONS GEMEENTE EN GEMEENSKAP:
- As jy môre op pad werk toe gefrustreerd vassit in die verkeer, dank die Here dan vir jou voertuig, jou werk en jou inkomste – daar is duisende wat graag plekke met jou sou wou ruil.
- Bid dat die Here ons meer dankbare mense sal maak; veral oor die talle voorregte en luukshede wat ons elke dag geniet. Dit kom immers uit sy Vaderhand en onverdiend na ons toe.

ONS LAND:
- Ons bid dat die Woord suiwer verkondig sal word in al ons Christelike kerke en dat ons geestelike leiers deur God geïnspireer sal word om die Woord korrek te interpreteer.
- Bid dat die regering se planne om beleggings na die land te lok, 'n merkbare verskil aan die hoë vlakke van werkloosheid sal maak.

ONS WêRELD:
- Bid vir die moontlikheid dat President Donald Trump en die Noord Korea leier, Kim Jong Un, persoonlik sal ontmoet nadat laasgenoemde onlangs die hoof van die CIA ontmoet het. Dit sal heelwat stabiliteit tussen die twee lande bring en hopelik ook lei tot verbetering in die lewensomstandighede van die Noord Koreane.
- Bid vir die lande in Afrika waar presidente nog 'n geneigdheid het om lewenslank te wil regeer tot nadeel van die mense en die vooruitgang van die land. Bid dat 'n meer demokratiese bestel ook in sulke lande tot stand gebring sal word.